Një grindje mbi targat e makinave duket një arsye e pamjaftueshme për të vendosur trupat në gatishmëri dhe për t’u përplasur me partnerët ndërkombëtarë. Por kjo është ajo që po ndodh tashmë mes Kosovës e Serbisë.

Këmbëngulja e Kosovës që qytetarët serbë duhet të dorëzojnë targat e tyre të lëshuara nga Serbia, po tensionon marrëdhëniet me mbështetësit e saj kryesorë ndërkombëtarë, BE-në dhe Shtetet e Bashkuara.

Trupat paqeruajtëse KFOR të NATO-s po shtojnë patrullimet në rast të ndonjë incidenti. Ndërkohë që ministri serb i Mbrojtjes deklaroi sot se trupat e saj po qëndrojnë në gatishmëri. Kjo, për të mbrojtur të gjithë qytetarët e Serbisë, përfshirë serbët në Kosovë.

Menjëherë pas mesnatës të së martës, policia e Kosovës filloi të jepte vërejtjet e para me shkrim. Vërejtjet erdhën pasi afati për ndërrimin e targave kishte skaduar. “E qortuara” e parë ishte një grua e ardhur nga Serbia përmes pikës së kontrollit në Jarinje, në veri të Kosovës.

Njoftimi i policisë paralajmëronte se ajo duhet të hiqte targat e lëshuara nga Serbia nga makina e saj deri më 21 nëntor, ose do të përballej me gjobë. Por shoferja kundërshtoi, duke thënë se ajo do të priste të dëgjonte nga qeveria e Serbisë përpara se të bënte ndonjë ndryshim.

Duket se ka pak mundësi që Beogradi të ndryshojë qëndrimin e tij. Aty thuhet se serbët e Kosovës kanë çdo të drejtë të përdorin targa të lëshuara nga Serbia, duke reflektuar mosnjohjen nga Serbia të shpalljes së njëanshme të pavarësisë së Kosovës në vitin 2008.

 

Petar Petkovic, shefi i zyrës së qeverisë serbe për Kosovën, ka theksuar klauzolat për të cilat këmbënguli se ishin prova se autoritetet në kryeqytetin e Kosovës, Prishtinë, kanë refuzuar marrëveshjet e arritura përmes një dialogu të ndërmjetësuar nga BE.

“Prishtina është fajtori i vetëm këtu. Jo vetëm që ky është një akt i shkeljes së marrëveshjeve të lidhura në kuadër të dialogut, por tani e kemi Prishtinën që ka shpallur përdorimin e dhunës për të zbatuar këtë vendim të paarsyeshëm”, tha ai për BBC.

Pretendimi për “dhunë” i referohet raportimeve se policia në Kosovë do të konfiskonte vetura me targa serbe. Në fakt, plani aktual është pak më pak dramatik.

Pas tre javësh të lëshimit të paralajmërimeve me shkrim, policia do të fillojë të japë gjoba prej 150 €. Faza tjetër përfshin konfiskimin e targave, me Prishtinën që këmbëngul që ri-regjistrimet të përfundojnë deri në prill të vitit të ardhshëm.

Zëvendëskryeministri i Kosovës, Besnik Beslimi, duhej t’i shpjegonte të gjitha këto në Konferencën e Sigurisë në Beograd të premten e kaluar, Por policia serbe nuk e la të hynte në territorin serb dhe e ktheu ktheu gjoja për sigurinë e tij.

Bislimi u shfaq përmes lidhjes video dhe tha se nuk ishte penduar që Kosova kishte injoruar lutjet e BE-së dhe SHBA-së për të vonuar goditjen.

“Prishtina thjesht po kërkonte që ligjet e saj të respektoheshin. Në të kaluarën, BE-ja ka pasur tendencë për të zgjidhur çështjet duke i shtyrë ato. Thjesht shtyrja vetëm e bën problemin më të madh. Dhe vetëm do të thotë se ne e transferojmë problemin te burokrati tjetër në BE. Ne nuk mendojmë se ky është ilaçi më i mirë për trajtimin e problemeve afatgjata”, tha ai për BBC.

Ndërkohë, diplomatët nuk kanë marrë mundimin të fshehin shqetësimin e tyre. BE tha se ishte “zhgënjyese” që këshilla e saj për të shtyrë goditjen për 10 muaj nuk u respektuan.

Ambasadori i SHBA-së në Serbi, Christopher Hill, u shpreh i zemëruar. Ai foli në të njëjtën seancë të Konferencës së Sigurisë në Beograd me Besnik Beslimin.

“Ne kemi folur për armë bërthamore kohët e fundit. Është më e rëndësishme se targat”. Kështu u shpreh Hill.

Hill i tha BBC-së se fokusimi në detajet e vogla nuk do të zgjidhte çështjet themelore ndërmjet Kosovës dhe Serbisë.

“Ne do të kishim dashur të kishim parë të gjithë këtë çështje me targa të zhvendosur. Në mënyrë që të mund të vazhdonim me çështje më të rëndësishme. Nëse ka disa përpjekje për t’u marrë me çështjet më të gjera, atëherë çështjet si targat do të bien në vend”. Kështu u shpreh ai.