Katër humbje në katër ndeshje markuan aventurën europiane të Tiranës, me kampionët në fuqi të vendit të paaftë të vendosin prestigjin jo vetëm në Champions, por edhe në Conference League, turneu i tretë i nivelit të UEFA-s. Ajo që ishte menduar si një rrugëtim që mund të përvijohej i gjatë për bardheblutë mes dy kompeticioneve dhe në bazë të kundërshtarëve që mund të gjente përballë në short, rezultoi me dy eliminime që kanë ngushtuar portofolin e hyrjeve nga UEFA në rastin më të keq në gjysëm e shifrës që kryeqytetasit mund të fusnin në arkat e klubit.

Me 300 mijë për prezantimin në Champions e 350 për raundin e dytë të Conference, Tirana e ka cuar bonusin në 650 mijë, por do të kishte mundur të arrinte pa problem në 1 milionë e 450 nëse kalonte Dudenlange edhe nëse mundej në raundin e dytë të Champions, që do të thoshte zbritje në playoff të Conference. Edhe nëse eleminohej Zrinjski, arritja e raundit të tretë të turneut do të shtonte 550 mijë euro të tjera në totalin e bardhebluve, që sikur të mos mjaftojë përfitimi i reduktuar actual, duhet të shqetësohen për pasojat në merkato që mund të sjellë ky eleminim i shpejtë.

E nuk bëhet fjalë për atë në hyrje, por në dalje, ku financat tani diktojnë edhe të ardhmen e lojtarëve të rëndësishëm si Taulant Seferi, Totre që është praktikisht i ikur dhe ndonjë sirenë e papritur interensimi që mund të shfaqet për Ismajlgecin apo Bekajn. Kështu, përpara se të mendojnë për përforcimin e skuadrës në vigjilje të kampionatit, drejtuesit e klubit duhet të merren me ndalimin e rrjedhjeve, gjë që në dritën e zhvillimeve të fundit nuk duket kaq e lehtë. E të rindërtosh një skuadër më pak se një muaj nga starti i Superiores penalizon keq objektivat e bardhebluve, që e gjejnë veten në një pozitë shumë delikate…