E ardhmja e Cristiano Ronaldos është akoma e mbuluar me një mjegull të dendur. Pas pakënaqësive dhe mungesave verore të portugezit, e sidomos pas 86 minutave në pankinë gjatë fitores së Manchester United ndaj Liverpool, shumë besojnë se largimi i tij nga Old Trafford është vetëm çështje ditësh.

E janë të shumtë tifozët europianë që ëndërrojnë ardhjen e CR7 në ekipin e tyre, edhe pse jo të nivelit më të lartë. Po, sepse mesa duket klubet më të rëndësishme europiane nuk janë të interesuara për 5-herë Topin e Artë dhe për pasojë hapen mundësitë për të tjera më pak të famshme. U fol për Borussia Dortmundin, ndërkohë që ditët e fundit ka dalë në skenë edhe emri i një skuadre franceze. E ka të dhëna që e forcojnë hipotezën.

Ka një hashtag që ditët e fundit është trend në rrjetet sociale: #RonaldOM. Me pak fjalë, Ronaldo te Olympique Marseille. Tifozët e klubit francez e ëndërrojnë dhe tashmë po mendojnë për një përplasje të mundshme kundër Leo Messit dhe Paris Saint Germainit të tij. Për momentin, megjithatë, ka shumë pak gjëra konkrete dhe operacioni duket jo i mundshëm sidomos për shkak të kostove të tepruara që do të sillte ardhja e fenomenit portugez për shoqërinë. Megjithatë, OM do të luajë në Champions League dhe kjo, siç dihet, është një nga kushtet e vendosura nga CR7 në zgjedhjen e ekipit të tij të ri. E në kohën kur shumë ish-lojtarë të mëdhenj të OM, si Djibril Cisse, të cilët e ftojnë portugezin të zbarkojë në Marsejë, shfaqet edhe një e dhënë në faqen zyrtare të klubit.

 

Në fakt, videot e publikuara në rrjetet sociale tregojnë se në faqen zyrtare të klubit, e cila është plotësisht funksionale, ka vetëm një problem të vogël: klikimi në skedën e Jonathan Clauss, numri aktual 7 i Marseille, shfaqet gabimi i njohur 404, “faqja nuk u gjet”. Sipas disave, arsyeja është se në Marsejë tashmë po ndryshohen kodet për të futur skedën e Ronaldos në vend të Clauss. Rastësi, iluzion apo e dhënë? Fakti është se në Marsejë nuk flitet për asgjë tjetër…